Pas tragjedisë që ndodhi sot në Çair, ku humbën jetën dy qytetarë, nga Komuna e Çairit ka njoftuar se “punimet e filluara për kyçjen në infrastrukturën nëntokësore nuk kanë pasur lejen për realizim dhe të njëjtat kanë filluar gjatë ditës së sotme, ditë jo pune – Е Shtunë”.

Ndër të tjerash, në komunikatën e dërguar nga Komuna e Çairit është shprehur ngushëllime për familjarët e viktimave.

“Komuna e Çairit shpreh ngushëllime të sinqerta ndaj familjarëve të viktimave në aksidentin e sotëm përballë Shkollës Fillore “Penko”. Në vendngjarje menjëherë ka dalur Inspektorati i Komunës së Çairit për të verifikuar situatën faktike dhe për të konstatuar a janë respektuar normat e parapara ligjore për këtë lloj të punimeve nga ana e realizuesit. Sipas procesverbalit të përpiluar nga ana e inspektorëve në terren, punimet e filluara për kyçjen në infrastrukturën nëntokësore nuk kanë pasur lejen për realizim dhe të njejtat kanë filluar gjatë ditës së sotme, ditë jo pune – Е Shtunë”, thuhet në komunikatën e Komunës së Çairit, transmeton portalb.mk.

Në lidhje me rastin është deklaruar edhe Ministria e Punëve të Brendshme (MPB). Nga atje thonë se rasti ka ndodhur rreth orës 11:00, ndërkaq jetë kanë ndërruar dy persona të moshës 26 dhe 28 vjeçare..

“Më 01.06.2019, rreth orës 11:00 është denoncuar se te rruga “Kemal Sejfula”, përballë Poliklinikës “Çair”, gjatë realizimit të groposjes në tokë me ekskavatorë, për rrjet të ujësjellësit, ka ardhur deri te rrëshqitja e tokës, dhe më pas në kanal nga rrëshqitja janë ngujuar tre persona, të cilët kanë punuar për groposjen. Dy nga personat e ngujuar (26 dhe 28-vjeçar), kanë ndërruar jetë në vendngjarje, ndërkaq personi i tretë (54-vjeçar) me veturë të Ndihmës së Shpejtë është dërguar në SPQ “Naumi i Ohrit”. Në vendngjarje janë dërguar ekipe të Ndihmës së Shpejtë dhe ekipe të Brigadës së Mbrojtjes dhe Kundërzjarrit. Vdekjen e kanë kontastuar mjekë të Ndihmës së Shpejtë”, thanë nga MPB-ja.

Nga atje njoftuan se për rastin është njoftuar edhe Prokuroria Publike dhe Inspektorati Shtetëror i Punës.

Punonjësit është dashur të gërmojnë tokën dhe të vendosin një gyp në sistemin e kanalizimit, në thellësi prej 4 metrave, paralelisht ka punuar edhe një person me eskavator. Në një moment goma e eskavatorit fundoset në tokën e butë duke shtyrë dheun dhe kështu i mbulon ata që kanë qenë duke punuar.